*******************
يالتحب حسين أحظر بالعزاء والطم اعله الراس بچفوف الولاء
******************
عن أمامي الصادق انقل هالخبر أحيوا أمر العتره البصوب النهر
وزوروا گبر حسين عشرين بصفر يبقه هذا اليوم للعتره ولاء
*****************
يالتحب حسين هالمجلس عظيم هوه بالدنيه الصراط المستقيم
واليسلكه يوصل الجنة نعيم تحظر المجلس بعبره الأنبياء
*****************
منبره بعاشور أكبر مدرسه دم ابو السجاد هوه الأسسه
وهالذكر للأبد أحنه انقدسه والظهور المنتظر هذا الرثاء
**************
ألطم اعله الراس واعلم يا محب لطمك اعله السبط يمسح كل ذنب
بايد أمه الزهره أجرك ينكتب فاز من اتسجّله خير النساء
***************
بايد أمه الزهره تسجيل الأجر وتعتني الكل مجلس البيه ينذكر
وليدهه المظلوم محزوز النحر سالت اوياه عالنهر أطهر دماء
***************
البضعه تنشد عالعزيّه بكل جان والدة ومفجوعة ويشدهه الحنان
تبقه وبهذا الوضع طول الزمان گول لامه الفاگده كلنه فداء
***************
كون تعرف حال أخته بهالوضع أبد ما ينگطع من عدهه الدمع
گبالهه راس ابو سكينه ينگطع وناحت اوياهه الأرض ويّه السماء
****************
لوَن حبره ابحور واقلامه الشجر أبد ما يحصي ثوابه كل بشر
مجلس ابن الهادي كلمن بيه حظر والمريض الماله طب هوه الدواء
*****************
خادم أهل البيــــت (ع) قاسم حسين المندلاوي
القصيدة الثانية:-
هالليله هالليله / عفتوني هالليله
بالغربه وبهالحال / من يحرس الأطفال / عفتوني هاليله
************
موقف يهد الحيل يا خويه هالموقف
دمك يا نور العين من كل كتر ينزف
والجانت اتهابك ضدك صفت تهتف
من بعد ذاك العز وامنين اجاني الطف
ما تبرد ما تبرد / لوعتكم ما تبرد
عالنهر چم اهلال / من يحرس الأطفال / عفتوني هالليله
***********
ما گلتوا من عدهه أم الخدر هاليوم
عالنهر بين اجناب والنايبات اتحوم
عالكدر واللوعات شيصبّر المضيوم
وآنه مصابكم تحرمني حتى النوم
أتمرمر اتمرمر / بهمومي اتمرمر
متغيّرة الأحوال / من يحرس الأطفال / عفتوني هالليله
************
شمر الرجس بالسوط يتجّاسر اعلينه
واحنه بوسط ظلام منهو اليحامينه
واسمع حجي عباس داسوا صواوينه
ظربوني ظربوني / من بعده ظربوني
وراسه برمح ينشال / من يحرس الأطفال / عفتوني هالليله
***********
كلمن أله أعمام تنزلّه للحومه
ينحمل عالأكتاف يتشيّع بيومه
وابن امي ضل مطروح واتغسله دمومه
عالغبره أبو الأحرار وكل اخوته نومه
محتاره محتاره / بهمومي محتاره
من للحمل لو مال / من يحرس الأطفال / عفتوني هالليله
**********
حركوا خيمنه الكوم وتلتهب بيهه النار
واتعدوا اعلينه وسبّوا علي الكرار
صعبه عليكم هاي أدريهه هالأقمار
بس الدهر خَوّان طبعه يظل غدار
مفجوعه مفجوعه / خلاني مفجوعه
راواني الأهوال / من يحرس الأطفال / عفتوني هالليله
*********
ما أعرف المجهول لو طلع هالمصباح
شمخفّي هذا الليل يا نايبه واجراح
وآنه اسمع بكتري ون وهضم وانياح
وانتم يا خير الناس بس جثث ماكو رواح
والخدّر الخدّر / من يكفل الخدّر
مو خابت الآمال / من يحرس الأطفال / عفتوني هالليله
0 التعليقات:
إرسال تعليق